Добрыя справы 

Дапамагчы можа кожны

Пераўтварыце пластык у дапамогу дзецям

У дзяцінстве мы збіралі накрыўкі ад газіроўкі, мяняліся імі па колерах і нават рабілі з іх бірулькі. Цяпер у інтэрнэце можна знайсці мноства варыянтаў, што зрабіць з пластыкавых накрывак. Але ёсць самы патрэбны – дапамагчы дзецям. Грошы ад перапрацоўкі пластыку могуць палепшыць жыццё тым, хто моцна хварэе і мае патрэбу ў маральнай і матэрыяльнай падтрымцы.

Я даведалася аб праекце з інтэрнэту. Я сама маці і прачытаўшы, адразу вырашыла для сябе, што буду дапамагаць. Не заўсёды атрымліваецца «адарваць» ад заробку грошы для дабрачыннасці. А тут звычайныя накрыўкі, якія мы выкідваем. Працую ў сярэдняй школе №7. Прыйшла ідэя арганізаваць агульнашкольную дабрачынную акцыю «Новае жыццё ў абмен на накрыўкі». Кіраўніцтва ўстановы мяне падтрымала. Першымі паўдзельнічалі рабяты з піянерскай дружыны ім. Л. Сечка. Затым гэтая вестка разнеслася не толькі па ўсёй школе, але і па горадзе.

Папулярнасць гэтага руху ў тым, што гэта просты жэст, які чалавеку нічога не варты, а пры гэтым дапамагае і экалогіі, і людзям – на пратэзы, інвалідныя каляскі, дарагое лячэнне і іншае. Падобныя праекты рэалізуюцца па ўсім свеце. Акцыя знайшла падтрымку і ў Беларусі, бо яна мае асаблівую значнасць і актуальнасць.

Можна збіраць усё, што трапіцца на вочы: пластыкавыя накрыўкі ад любых бутэлек, непатрэбныя колцы ад дзіцячых машынак, пластмасавыя дэталькі ад цацак, шкляначкі і лыжачкі ад лекаў і дзіцячых сумесяў, каўпачкі ад фламастэраў і многае іншае. Збірайце пластык дома сем’ямі. Распаўсюджвайце інфармацыю аб праекце праз сваіх сяброў і знаёмых. Устанаўлівайце кантэйнеры для іх збору (гэта можа быць любая скрынка або ёмістасць) у пад’ездах свайго дома, на рабоце, у класах школ, у групах дзіцячых садоў, кафэ. Перадаць сабраную другасную сыравіну можна ў пункт прыёму ў СШ №7 (вул. Драздовіча, 32). Тэл. +375-29-7346970 (Надзея).

Дапамажыце пластыку не стаць проста смеццем!

Н. АЎСЯНАЯ,

СШ №7 г. Навагрудка.